Die Teksa Radiobeheer Model Klub het Saterdag heerlik gebraai terwyl die model vliegtuie die lug deurkruis het.
Die wind het lastig die gras rond gewaai en dwarel winde oor die aanloopbaan gemaak maar dit het nie die vlieëniers se geesdrif gedemp nie. Groot en klein was daar om bietjie te kan vlieg. Een vliegtuig het selfs naby die 200km/h merk gedraai.
Dit is ‘n belewenis om die vliegtuie in die lug te sien en die vernuf van die vlieëniers te aanskou
Meer as 40 jaar gelede (in 1979) was daar al belangstelling in diè sport in hierdie area en vroeg in 1980 is daar met ‘n amptelike klub begin deur ongeveer sewe vlieëniers waarvan slegs een of twee kon vlieg en die ander moes oplei.
Die klub was bekend as die Evander Model Vliegklub en het betreklik vinnig gegroei. Die vliegveld was geleë op Sasol gronde naby die ou tronk van destyds, aan die Sasol kant van die spoorlyn.
Teen mid 1980 het die klub verskuif na gronde tussen Evander en Brendan Village omtrent regoor die ou Evander Vliegveld. Goeie aanloopbane, veiligheidsheinings en ‘n klubhuis was in ‘n kort tydjie gereed en ‘n “fly-in” is gereël. Dit was ‘n reuse sukses en daar was op daardie dag byna 80 radio’s beheer by Frekwensie Kontrole!
Lees ook: Photographers shine at first meeting for 2022
Die ou Evander Vliegveld het later in onbruik geraak en is toe aan die lede beskikbaar gestel. Lede het egter begin min raak en hiervanaf het klublede maar gevlieg waar en wanneer hulle kon, soms op ongemaklike en onveilige plekke.
Op 11 September 1991 is daar toe ‘n stigtingsvergadering gehou om ‘n nuwe vliegklub te begin, tydens die vergadering word bestuur verkies en ‘n konstitusie is opgestel wat in beginsel ooreenstem met SAMAA Konstitusie.
Daar word op ‘n amptelike naam besluit nl: Teksa Radiobeheer Model Klub. Weereens begin die rondswerf opsoek na ‘n “land van vlieg en geniet”.
Daar is eers by Julius Engelbrecht op die plaas gevlieg, daarna weer op die ou Evander Vliegveld, daarna is op die plaas van Koos Kruger, net buite Trichardt gevlieg.
Presies ‘n jaar nadat die klub ‘n vertoning op Secunda vliegveld gelewer het, is daar ‘n stukkie grond agter Graceland, beskikbaar gestel
Na al die jare van rondswerf het die groep “flying fanatics” op ‘n stukkie grond in Trichardt afgekom. Vol geesdrif bou die klublede iets uit niks vir die soveelste maal.
‘n Pawiljoen, klubhuis, betonmuur en later “ablusie geriewe” is opgerig en klublede sien eindelik hoe hul droom ‘n werklikheid word met n teer aanloopbaan wat 19 Julie 1997 amptelik ingewei is, waar daar tot vandag toe nog gevlieg, gekuier en gebraai word, met jaarlikse fly-ins.
Klublede vlieg gewoonlik naweke maar sommige vlieeniers in die week wanneer hul kans kry. Vlieg is n familie sport dus kan mans, vrouens en kinders deelneem. TRMC bied gratis vlieg-opleiding aan nuwelinge.
Kontak persone:
Johan: 064 780 4036 Skip: 074 580 0550 Kenneth: 082 335 5498
