Wat ‘n voorreg is dit nie om weereens aan die vooraand te staan van nog ‘n opwindende akademiese skooljaar wat voorlê nie. Laerskool Secunda het 2019 afgesluit met baie seëninge en voorspoed vanaf ons Hemelse Vader. In 2020 sal die skool voortbou op die voordelige en positiewe verhoudings wat gevestig is en daarop fokus om nuwe verhoudings die lig te laat sien.
Die skool, wat uit sy nate bars as gevolg van groeiende getalle, sien uit daarna om in 2020 voort te bou op die wenkultuur wat stadig, maar seker gekweek is deur passievolle personeel, ongelooflike talentvolle klein wenners en ‘n ondersteunende ouerkorps.
Namens die hoof, Mev Marietha Cole, alle personeel asook die beheerliggaam verwelkom ons graag al die wenners terug na n luilekker lang vakansie. ‘n Spesiale woord van welkom gaan aan al die nuwe Gr RRR, Gr 1 wenners en hul ouers. Wees verseker dat Laerskool Secunda die regte keuse was! Laerskool Secunda wens ook alle lede van die Secunda-gemeenskap ‘n baie voorspoedige nuwe jaar toe.
Hou Laerskool Secunda se wenfabriek dop. Hierdie jaar gaan n grote wees! Volg ons gerus op Facebook (Laerskool Secunda) vir positiewe nuus asook bemarking van opwindende geleenthede wat hierdie jaar deur die skool ge-organiseer word.
Elke kind is n wenner. #wenner
